Sa pangunguna ni Vice Mayor Grace David kasama ang LGBTQIA+ President Jeffrey Reyes at mga opisyales nito, isinagawa kahapon, araw ng Lunes ang pormal na panunumpa ng mga bagong LGBTQIA+ officers ng Limay. Patunay ito sa pagkilala sa mahalagang papel ng LGBTQIA+ sa ating komunidad upang magkaroon ng isang bukas, pantay at makatarungang pamayanan. Ang mga bagong opisyal ay manunungkulan bilang kinatawan ng sektor na matagal nang lumalaban para sa pagkakapantay-pantay, dignidad, at karapatang pantao. Magiging katuwang sila sa pagbuo ng mga programang tutugon sa diskriminasyon at iba pang isyung kanilang kinakaharap. Ang paghahatid ng isang epektibo at serbisyong may puso ay hindi lamang nasusukat sa kasarian, kundi sa malasakit, katapatan, at kahandaang tumulong para sa kapwa. Mabuhay ang mga bagong LGBT officers ng Limay! Isang patunay ito na sa Limay ay may puwang ang lahat— anuman ang kanilang kasarian o pagkakakilanlan.

Ginanap po ang seremonya sa pagtataas ng bandila ngayong araw sa Limay Sports Complex, Brgy. Reformista, Limay, Bataan. Ngayong buwan ng Hulyo, ang ating bayan po ang napili ng Pamahalaang Panlalawigan at ang mga kabataan na kinabukasan ng ating bayan at lalawigan naman po ang sentro ng programang bisita bayan kada buwan. Ilan po sa mga tinalakay natin ay ang mga mahahalagang programa gaya ng Teen Information Center, Tobacco-Free Generation, Mental Health Awareness, Sports and Active Lifestyle, at Iskolar ng Bataan. Layon po ng programa na siguruhin ang kanilang magandang kinabukasan at bigyan sila nang mas maraming oportunidad tungo sa katuparan ng kanilang mga pangarap sa buhay. Nagkaroon din po ng pagkakataon na magkaroon ng talakayan sa pagitan ng Sangguniang Kabataan ng Limay at Iskolar ng Bataan kay Governor Joet Garcia upang bigyang linaw ang mga katanungan at pakinggan ang kanilang mga pangangailangan at mungkahi. Kasabay po ng programa ay ang paggawad ng parangal sa mga atletang mag-aaral mula sa ating lalawigan na lumahok sa Palarong Pambansa at na-uwi ng karangalan sa ating lalawigan. Bukod pa po dito, sa harap ng mga opisyales ng lalawigan at mga mamamayan ng Limay, nagbigay-ulat si Mayor Richie Jason David kaugnay sa mga tagumpay at inisyatiba ng kanyang administrasyon, gayundin ang mga plano at proyekto na nakatuon sa patuloy na pag-unlad ng bayan. Mula sa mga programa sa edukasyon, kalusugan, kabuhayan, at imprastraktura, ipinakita ng alkalde ang direksyon ng kanyang pamumuno tungo sa isang mas progresibong Limay. Nakasama po sa programa sina Governor Joet Garcia, Vice Gov. Cris Garcia, Mayor Richie Jason David, Vice Mayor Grace David,SK Federation President AJ Joaquin at SK Federation Limay, SP at SB Members, DEPED Bataan SDS Carolina Violeta, mga kinatawan mula sa HPB, POPCOM, PSWDO, BYDO, gayundin ang mga opisyal at kawani ng yunit pamahalaang lokal at mga punong barangay.

Ngayong araw ay pormal na tinanggap ng ating Mayor Richie Jason D. David ang isang (1) Patient Transport Vehicle o PTV mula sa Philippine Charity Sweepstakes Office (PCSO). Ito ay ginanap sa Quirino Grandstand sa pangunguna ni Pangulong Ferdinand Marcos Jr. kasama ang iba pang opisyales ng gobyerno at opisyales ng iba’t ibang bayan na makatatangap ng donasyon. Bawat PTV ay may stretcher, oxygen tank, at blood pressure monitor upang makasiguro sa maayos, ligtas at maagap na pagdadala ng pasyente patungo sa pasilidad medikal. Ang Pamahalaang Bayan ng Limay ay lubos ang pasasalamat sa PCSO sa pagsuporta sa mga proyektong pangkalusugan ng mga lokal na pamahalaan. Isang hakbang tungo sa mas maayos at episyenteng serbisyong pangkalusugan para sa bawat Limayans!

Inaanyayahan namin ang lahat ng drayber at motorista na makilahok sa libreng Safety Road Awareness seminar na ito sa darating na Hulyo 13, 2025 araw ng Linggo sa Limay Sport Complex, simula 8:00 am – 05:00 pm. Layunin nitong makapagbigay ng karagdagang kaalaman sa reponsable at ligtas na pagmamaneho sa kalsada. Ikinalulugod namin ang inyong partisipasyon sa pagpupulong na ito.

Ginanap kahapon, ika-7 ng Hulyo 2025 ang unang araw ng trabaho ng 150 SPES beneficiaries na estudyante mula sa Limay Polytechnic College (LPC) sa ilalim ng Special Program for Employment of Students (SPES). Sa pangunguna ni PESO Manager Evangeline C. Mariano, ipinaliwanag sa mga mag-aaral ang mga alituntunin at regulasyon na dapat sundin sa kanilang panahon ng pagtatrabaho. Nagbigay naman ng inspirasyon at motibasyon sa mga kabataan ang ating butihing Pangalawang Alkalde, Kgg. Grace R. David, at ang mahal nating Punong Bayan, Kgg. Richie Jason D. David. Ang mga SPES beneficiaries ay naitalaga sa iba’t ibang departamento sa munisipyo, pati na rin sa mga barangay at pampublikong paaralan. Sila ay magseserbisyo ng kabuuang 180 oras o 20 araw, at makatatanggap ng sahod mula sa Local Government Unit (LGU) Limay at sa Department of Labor and Employment (DOLE). Ang sahod na kanilang matatanggap ay malaking tulong bilang pandagdag sa kanilang allowance sa pag-aaral, na makatutulong upang maipagpatuloy nila ang kanilang edukasyon nang mas magaan para sa kanilang pamilya. Kami po ay taos -pusong nagpapasalamat sa ating butihing Mayor Richie Jason D. David, Vice Mayor Grace R. David, sa buong Sangguniang Bayan, at sa PESO Limay sa walang sawang suporta at pagbibigay ng makabuluhang oportunidad sa mga kabataang Limayans. Isa itong malaking hakbang patungo sa kanilang personal na pag-unlad at tagumpay sa hinaharap.

Nag-courtesy visit noong Biyernes, ika-4 ng Hulyo 2025 ang ANGATLETA SPORTS BATAAN kay Mayor Richie Jason D. David bilang pasasalamat sa walang-sawang suporta ng pamahalaang bayan para sa mga kabataang atleta. Matapos mag-uwi ng bronze medal sa katatapos na Smart Spike Invitational sila ay muling maghahanda para sa isang mas malaking laban, ang Gameville Fil-Nation International Volleyball League Season 2. Ang Pamunuan ng Limay ay patuloy ang pagbibigay ng oportunidad at inspirasyon sa mga programang pangkabataan at pampalakasan upang maipamalas ang kanilang galing — hindi lang sa akademya, kundi maging sa larangan ng isports.

Naganap kahapon, July 4, ika-9 ng umaga ang isang makabuluhang ugnayan at usapan kasama ang mga leaders ng Senior Citizens ng 12 Barangays,.at noong ika-1 ng hapon ay inilaan para sa ating mga PWDs. Nagkaroon ng kwentuhan sa mga saloobin, hinaing, at mga kahilingan ng Senior Citizens at PWDs. Naki-isa ang ating Vice Mayor Grace David sa mga kaganapan na pinangunahan ni PGS Focal Person SB Manny Ambrocio at OSM Chairperson Faye Fernando. Buo naman ang suporta sa mga ganitong uri ng programa ng buong pamunuan sa pangunguna ni Mayor Richie Jason David.

𝗝𝗨𝗡𝗘 𝟯𝟬, 𝟮𝟬𝟮𝟱 Isang makasaysayang araw ng pagkilala at panibagong paninindigan para sa mga lingkod-bayan ng Bataan! Sa ginanap na Oathtaking Ceremony sa People’s Center, Balanga City, sa pangunguna ni Governor Joet S. Garcia ay sabay-sabay na nanumpa ang mga bagong halal na opisyal mula sa iba’t ibang munisipalidad ng lalawigan. Isang kaganapang nagpapakita ng pag-kakaisa, panibagong pananagutan, at iisang layunin upang makapag dulot ng makabuluhang pagbabago para sa buong lalawigan ng Bataan. Samantala, kasunod ring ginaganap ang Oath-taking and Turnover Ceremony ng mga bagong halal na lokal na opisyal ng Bayan ng Limay sa Limay Municipal Hall Lobby na pinangunahan ni 𝗝𝘂𝗱𝗴𝗲 𝗘𝗺𝗮𝗻𝘂𝗲𝗹 𝗦𝗶𝗹𝘃𝗮. Sa muling pagtitiwala ng taumbayan kay 𝗠𝗮𝘆𝗼𝗿 𝗥𝗶𝗰𝗵𝗶𝗲 𝗝𝗮𝘀𝗼𝗻 𝗗𝗮𝘃𝗶𝗱, kasama ang ating bagong 𝗩𝗶𝗰𝗲-𝗠𝗮𝘆𝗼𝗿 𝗚𝗿𝗮𝗰𝗲 𝗗𝗮𝘃𝗶𝗱, at ang mga kagalang-galang na miyembro ng Sangguniang Bayan, 𝗛𝗼𝗻. 𝗦𝗮𝗿𝗮𝗵 𝗩. 𝗗𝗮𝘃𝗶𝗱, 𝗛𝗼𝗻. 𝗖𝗲𝗰𝗶𝗹 𝗚𝗲𝗿𝗮𝗿𝗱 𝗖. 𝗥𝗼𝘅𝗮𝘀, 𝗛𝗼𝗻. 𝗥𝗲𝘀𝘁𝗶𝘁𝘂𝘁𝗼 𝗣. 𝗥𝗲𝘆𝗲𝘀, 𝗛𝗼𝗻. 𝗗𝗲𝗻𝗻𝗶𝘀 𝗥. 𝗚𝗼𝗰𝗵𝘂𝗶𝗰𝗼, 𝗛𝗼𝗻. 𝗥𝗲𝗺𝗶𝗴𝗶𝗼 𝗦. 𝗧𝗮𝘆𝗮𝗴,𝗝𝗿., 𝗛𝗼𝗻. 𝗥𝗼𝗿𝘆 𝗥. 𝗣𝗲𝗿𝗲𝘇, 𝗛𝗼𝗻. 𝗠𝗮𝗻𝗻𝘆 𝗣. 𝗔𝗺𝗯𝗿𝗼𝗰𝗶𝗼, at 𝗛𝗼𝗻. 𝗖𝗲𝘀𝗮𝗿 “𝗔𝗺𝗮” 𝗗𝗲𝗹𝗮 𝗥𝗲𝗮, asahan po ninyo ang isang pamahalaang mas bukas, makatao, at nakatuon sa tunay na pag-unlad ng buong bayan ng Limay. Nagbigay naman ng isang makabuluhang mensahe si outgoing SB Member na si 𝗞𝗼𝗻𝘀𝗲𝗵𝗮𝗹 𝗠𝗲𝗹𝗰𝗵𝗼𝗿 𝗟. 𝗙𝗲𝗿𝗻𝗮𝗻𝗱𝗼 at outgoing 𝗞𝗼𝗻𝘀𝗲𝗵𝗮𝗹 𝗔𝗹𝗳𝗿𝗲𝗱𝗼 𝗩𝗶𝗹𝗹𝗮𝘃𝗶𝗿𝗮𝘆. Ang buong pamunuan ng bayan ng Limay ay nagpapasalamat sa inyong dedikasyon, malasakit, at pakikiisa sa layunin ng lokal na pamahalaan at nagsilbing matibay na pundasyon ng ating mga tagumpay bilang isang komunidad. Ang selebrasyon na ito ay simula ng isang panibagong kabanata ng serbisyong may puso, lideratong may direksyon, at pamahalaang tapat na serbisyo at diretso sa tao.

Isinagawa ngayong June 25, 2025 ang isang makabuluhang Tree Planting Activity sa Sitio Kinaragan, Brgy. Duale, Limay, Bataan bilang bahagi ng PagbaBAGo: A Million Learners and Trees Campaign ng Office of the Vice President. Sa pagtutulungan ng OVP, CENRO Pilar, PENRO Bataan, at ng LGU Limay, layunin ng aktibidad na makapagtanim ng 3,000 punla bilang ambag sa pangangalaga sa kalikasan at patuloy na edukasyon ukol sa kahalagahan ng mga puno sa ating kapaligiran. Ang pamahalaang bayan ng Limay ay lubos na nagpapasalamat sa OVP sa pagkilala at pagtitiwala na maisama ang aming bayan sa ganitong makabuluhang kampanya. Sama-sama tayong nagtatanim ng pag-asa, para sa isang mas luntiang kinabukasan.

Sa patuloy na pagsuporta ng Pamahalaang Bayan ng Limay sa pangunguna ni Mayor Richie David, Vice Mayor Elect-Grace David, Vice Mayor Sarah David at SB Members, katuwang ang Municipal Agriculture Office, Department of Agriculture at BFAR, kami ay taos-pusong nagpapasalamat sa lahat ng mangingisdang patuloy na nagsusumikap para sa ikabubuti ng kanilang pamilya at ng ating komunidad. Ang pamamahagi ng mga kagamitang pangisda sa 30 registered fisherfolks ay bahagi ng ating adbokasiya na paunlarin ang kabuhayan sa sektor ng pangisdaan. Hinihikayat naming gamitin ito nang wasto at maayos upang higit pang mapalakas ang inyong hanapbuhay. Nawa’y magsilbing inspirasyon ito na patuloy tayong magkaisa para sa mas masaganang Limay, kung saan ang bawat mamamayan ay may pantay na pagkakataong umasenso.